مسقعه باللحم المفروم

احلي اكله في الدنيا بما اني مدمنه بذنجان بكل انواعه ، بس الطريقه بتاعتي شويه بتقلل من حده البذنجان و في نفس الوقت الطعم هايل و ده ميمنعش من تخمه برده.....

المكونات:

٤ بذنجان رومي ( وسط)

١/٢ كيلو لحمه مفرومه

٢ بصله

١ بطاطس

١ فلفل رومي

ملح - فلفل - بهارات

كيس بشاميل

١/٤ معلقه سمن

التحضير:

اول حاجه هنقشر البذنجان و البطاطس و نغسلهم. نقطع البذنجان داوير نصف سميكه و البطاطس صوابع و نقطع الفلفل الرومي الي اربع ارباع بالطول و هنرش ملح عليهم و نسيبهم.

هنعصج اللحم: نضرب البصله في الكابه و بعد كده في قلايه هنحط معلقه سمن عليها البصل و اللحمه و حبه ملح و فلفل اسود و البهارات و نقلب من وقت للتاني لحد ما تستوي،  و هنسيبها علي جنب

هنجيب قلايه فيها زيت كتير لقلي الخضار (البطاطس و البذنجان و الفلفل )و نبتدي بالبطاطس بعد كده الفلفل و اخر حاجه البذنجان.

اما البشاميل هنجيب ٤ كوبيات لبن في حله و نحط عليهم البشاميل ، ملح و فلفل و ربع معلقه سمن و نفضل نقلب لحد ميبتدي يتقل هنطفي عليه و نسيبه .

التسويه:

 في قالب بيركس او سنيه هنبتدي نرص البذنجان و بعد كده الطاطس و الفلفل الاخضر و فوقيهم اللحمه المعصجه و بذنجان تاني و بعد كده البشاميل و ندخل الفرن علي حراره ١٨٠ لحد منلاقي البشاميل ابتدي يمسك و زيت البذنجان ابتدي يغلي... هنوطي النار لمده ١٠ دقايق و بعد كده نولع الشوايه لحد ما الوش يتحمر.... و بس كده

...الف هنا